Doctor in Training

又到咗呢個初夏嘅時分，除咗係facebook上面各位med5同學熱烈慶祝final MB合格係咁叫人叫佢做醫生嘅同時，亦都係我哋現任houseman快將完成我哋嘅歷史任務，可以做返個人嘅時候啦！ 其實我上年呢個時候都未係好清楚究竟呢一年會係點嘅光景，點樣揀水，點樣做houseman，我果陣都係一頭霧水。希望呢個post會俾到啲idea你哋去準備呢個畢生難忘嘅一年啦！ 大家有興趣可以睇下呢段好有歷史同鼓勵性嘅片，當中都有好多熟悉嘅面孔。20年前嘅med5，都同我哋一樣經歷過同一個階段，考過MB，做過houseman。今時今日好多都成為咗獨當一面嘅教授或者顧問醫生。嚟緊呢一年的而且確會改變你對自己同埋對呢個職業嘅睇法，希望呢一段片可以啟發你思考下你嚟緊一年到底想獲得啲乜嘢。

Set 豆係一個醫生一定要識嘅技巧，有啲unit就一定係要houseman打豆，而有啲unit就由護士或者抽血姑娘負責，但係難打嘅豆都係要醫生出馬架啦，況且打豆嘅原理其實同好多其他medical procedures好相似，例如抽肺水／肚水／骨髓／脊髓液／打central line／A line，都係吉支針落去，抽啲嘢出嚟，+／－放條喉落去咁囉，所以只要你master到打豆，其他嘅procedure都係大同小異。