【開箱試用簡報神器】全新簡報體驗 Present like never before: Logitech Spotlight Presentation Remote 無線簡報遙控器
以前上堂嘅時候，見到好多 lecturer 密密麻麻嘅唱 K 歌詞（喺醫學院我哋稱呼照 slide 讀呢個行為做唱 K），難以明白簡報嘅重點，講嘅冇癮，聽嘅又眼瞓。有時有人會用 laser pointer 當你係貓咁玩，將個紅點震下震下咁飛來飛去，隻眼都未必跟得切，仲要好驚個 laser 會射中自己。好多時候教嘅人表達唔到想教嘅嘢比要學嘅人。都要自己睇番，學習效果未必最理想。
畢咗業之後，雖然我表面上係一個醫生，但係實際上我做 presentation 多過見病人（好似係）。由入呢個專科嘅第一日，就要開始喺唔同嘅大小嘅會上面 present。由自己部門內嘅會議，到各大佬都參與嘅大會，我從唔同前輩身上學習，參考佢哋做嘅 Power Point，講嘢嘅風格。慢慢開始發現，原來要做好一個 presentation 都係一門學問。
而家我都係上網，睇書去學 presentation。一個 presentation 除咗內容結構，包裝設計之外，個講者都好重要。講嘅人同聽嘅人之間嘅溝通同埋連繫，係個 presentation 能否成功嘅重點。無論一般 iPhone 幾出色，都要一個 Steve Jobs 去 present 佢出來。一個成功嘅 presenter 就係要將佢要表達嘅思想引入觀眾嘅腦中。
 |
| "What is the most resilient parasite? Bacteria? A virus? An intestinal worm? An idea. Resilient... highly contagious. Once an idea has taken hold of the brain it's almost impossible to eradicate. An idea that is fully formed - fully understood - that sticks; right in there somewhere." - Inception (2010) |
當然啦，工欲善其事，必先利其器，一個好嘅簡報遙控器的確可以幫助到 presenter 完全控制簡報嘅 flow，突出簡報嘅重點，令觀眾接收到你想 deliver 嘅 message。比較下舊式傳統嘅 presentation remote，大多數係前後按鈕再加個 laser pointer，好啲嘅有可能會有個 LED 計時器。最近 Logitech 就新出咗一隻 presentation remote，而我又喺各位朋友大力幫助下得到優先試用嘅機會。
Logitech 啱啱喺二零一七年四月推出 Spotlight係佢哋最新一代嘅 presentation remote。今次到手嘅係香檳金色嘅版本。有別於一般 presentation remote 黑黑實實嘅外型，Spotlight最吸引人視線嘅係佢有如蘋果系列產品嘅設計，簡約而修長，三種顏色嘅金屬機身，只有三個控制按鈕，揸係手上唔會好似電視遙控咁大舊。
 |
 |
 |
| 揸上手就咁上下（借 Apple Store 圖） |
 |
 |
除咗USB 無線連線外，都可以用藍牙連接。無線傳輸範圍聲稱有30米，應該都足夠講者喺台上自由走動。
進階指標系統係 Spotlight 嘅新賣點，用來代替原有 laser pointer 功能。聽聞 Spotlight 係用陀螺儀去偵測用家手部動作，所以唔使再用個 remote 瞄來瞄去，個指標穩定啲，觀眾都冇睇得咁辛苦，而且就算背向螢幕都可以控制。
指標模式有三種，分別係高亮顯示，放大同埋圓圈，而每個模式都可以選擇指標嘅大細。
高亮顯示其實係 dim 咗 cursor 以外嘅地方。
放大就顧名思義好似放大鏡咁。解像度係會爭啲，所以要諗下放大完個解像度放出來螢幕上面會唔會有影響。
圓圈就淨係圈住個 cursor 指住嘅部份。
同一時間可以開晒三個模式，撳兩下可以轉模式，但係我發現每次轉，撳完都會有一剎那會跳咗去新模式，有少少瑕疵。
另一個最好用嘅功能係 Logitech Presentation 軟件上嘅螢幕計時器。你可以自訂簡報嘅時間，當你開始咗簡報投影模式之後，佢就會開始計時，並且顯示喺第二屏幕上，喺倒完結數前五分鐘同埋完結時震動提醒。呢個功能我覺得係最啱我，因為好多時候都會講到過都過晒鐘，有震動提醒就 very good。不過最好有得 customise 幾多分鐘響一次啦，有時想分 part 計時方便啲。
另外除咗顯示倒數時間之外，仲可以顯示確實時間。
另外一個賣點就係佢可以自訂控制撳實上下頁制時候嘅功能。
- 向前／後快進即係 fast forward 或者 reverse 飛 slide，好似冇乜特別，自己係咁撳都做到啦，除非你想飛好多 slides。
- 空白畫面係 black screen。
- 捲動同埋音量控制都係比較特別嘅新功能，兩者都係利用3D 加速感應器同陀螺儀偵測遙控器嘅動作去控制。捲動即係好似 iOS 睇相嘅control，向上／左就係返回，向下／右就係向前，不過認真無乜用。音量控制就係一樣原理，不過係控制音量大細，方便如果有需要播片。兩者都係姿態上比較有型，實際用途就見仁見智啦，但係點都型過上面向前／後快進或者係咁撳嘅。
- 自訂做 Esc 或者其他比較常用啲功能可能會有用啲。
總結
今次都係一個簡單嘅 Logitech Spotlight 試用，除咗型仔之外，方便連接，配合埋 Logitech Presentation 軟件功能，實在可以幫助到 Presenter 去演繹自己嘅 idea。不過好多時無得裝軟件嘅話功能就大打折扣，不過作為一個簡報遙控都係恰如其分。我個人比較啱用嘅功能都係時間提醒，同埋進階指標系統去 highlight 簡報嘅重點。我仲未有機會實戰，希望可以研究下，期待下次做 presentation 睇下會唔會與虎添翼啦！
留言
張貼留言