Final MB 準備心得

其實final MB真係一個只要大家互相合作就會贏嘅遊戲，有source大家分享下咪大家都識多啲成班一齊叻！其實我都要多謝好多開心share唔同source比我嘅同學們。期望好快就可以同大家合作做嘢啦！

利申：我唔係咩丁人，所以要丁就唔好學我啦 ：P



1 year before final MB

1. 自己整notes http://nikekclau.blogspot.hk/2014/06/med-5-how-to-organise-your-notes-for.html
2. 如果無時間／唔想整嘅，用J Notes + H Notes再揀一本好用嘅書，例如Pocket Medicine/Houseman Handbook/Washington Manual作為foundation
3. study group可以令大家知道大家嘅水準去到邊，互相督促下溫書進度，互相勉勵，同埋練下做戲讀下對白，及早熟習對人，考試就唔會咁緊張啦！
4. 我以前去台灣elective佢哋啲學生係會寫「共筆」，即係大家共同貢獻嘅筆記，都可能係一個節省時間嘅好方法！每人寫／整理一個specialty嘅notes，定時定候一切傾下，到考試嘅時候每科都有notes，咁就事半功倍啦！
5. 及早建立一個溫習同答問題嘅邏輯同組織，因為醫生抽書都係喜歡有組織同邏輯嘅答案！所以趁未有考試壓力時（其實最好係med3）熟習呢種答法。
6. 有case襯早無咩人爭嘅時候就好睇啦，到後期個個都panic要睇case就無咁容易架啦！仲有記住千祈唔好為咗睇case不顧一切！睇少一個半個VV腳唔會肥，但係偷睇咗唔屬於你嘅case就會遺臭萬年，到做MO都仲記得呀！
7. 搵下上幾年嘅revision lecture notes，有助你及早認定每科嘅重點，好似ortho嘅exam將會好仔細地重溫一次，比起做ortho時PE教得更加好！
8. 得閒嘅就諗定houseman做咩啦，雖然實情係冇得你揀，但係你仲有得換！好多人唔知自己想做咩；就趁仲有clinical exposure嘅時候體驗下真實嘅工作，因為收人錢做嘢同交學費學嘢嘅待遇真係好唔同架！有興趣嘅咪grandround present下impress下啲老細囉，分分鐘仲有獎攞添！

Christmas time

1. 都差唔多要收拾心情，進入備戰狀態，但係又唔洗太緊張既，呢個時候就應該有個粗略嘅評估，review下半年內自己溫書學習嘅進度如何，檢討下有咩不足，趁仲有時間計劃下有點樣把握剩低幾個月去針對缺點改善，最忌不自量力。大佬你上bedside跟round都知自己大約有幾多功夫，會唔會有危險心裡有數啦！
2. 記住整理notes，一再提及呢樣嘢係因為呢個時候唔整，到臨考MB已經冇時間啦！無論雜sur／ortho／medical乜都好，整理知識除咗可以鞏固記憶外仲可以搵出自己不足，如剩低嘅時間問下professor
3. 未睇source好快啲睇啦，知己知彼，百戰百勝呀
4. 千。祈。一。定。要。練。clinical！雖然聽落去好似係廢話，但係無論你知識幾咁淵博都未考過final MB架？除咗練稿練拳之外，重要把握時間控制。之前我都提及過，如果有一個自己問history嘅framework就會好有幫助，同埋記住就算考試幾亂到要跟返自己個framework，唔好比人distract。
5. 互相同同學抽下書，可以鞏固記憶，互補不足
6. 當有番咁上下功力，就要試下諗闊啲，做多啲聯想 ，啲ddx諗闊啲（啲咩VITAMINS C阿），啲management諗闊啲（其實都係biopsychosocial咁囉）

1 month before final MB

1. 根據我讀咗6年大學嘅經驗，考試嘅時候，無論你讀咗幾多書，練過幾多套拳，當你嘅身體狀態唔理想，所有表現都會大打折扣，相反你養精蓄銳去考，雖然可能會讀少兩份notes，但係你最少都有平常嘅功力再加個fully functional嘅腦袋去幫你解題呀！特別係clinical 考試要對人，好常見嘅就係你喺間房絞盡腦汁洗晒啲時間都諗唔到，一行出間房就識答；所以設記要照顧自己身體，食好啲瞓好啲，以最好狀態去考試！
2. 唔好走咁多堂！好多同學都會寧願自己摺埋溫書，其實千祈唔好！要走都唔好走晒，因為同教授們多啲溝通對了解應試技巧同埋考試範圍都有莫大嘅裨益......
3. 我有時都有整下cheat sheet （嗱cheat sheet咋，並唔係用來出貓架），一來又可以condense下啲knowledge，二來方便出街搭車溫習，三來拎去考場做last minute revision都幾好。

其實霎時之間我都諗唔到好多貼士，希望俾到個概念你自己再努力鑽研啦！